Sun l troi deberieda
Son na grupa de Gherdëina che se à ancuntà cun l medem fin: mëter su n proiet ulache mutons y mutans posse crëscer su se svilupan do si vester, se sentian tëuc su cun amor, n cuntat cun la natura.
Deberieda ons abinà stredes y manieres per co realisé l proiet y son damat cuntënc che l sibe śën realtà nce te nosta valeda.
Son dla minonga
che la sozietà y la forma de viver de al didancuei cuer tan dassënn la usc che n sënt dedite, che la cherdeda ndividuela ne ti la fej belau mei plu a unì ora y nëus se dajon ju per fins y ideies che nes vën dates da dedora y che semea nes fej ntujiasmé.
Nsci ie nce nasciuda la sozietà dl cunsum, che se slergia ora for plu y plu y tl medem mumënt devënta nce la dumanda dl senificat dl'esistenza for majera y majera.
L tëmp ie madur
Deberieda ulons jì de viers de n mudamënt dla cultura dla sozietà, n mudamënt tla maniera de coche la persones se cumporta y viv un cun l auter, per realisé na cunvivenza cui autri a na cërta maniera, che la sibe positiva per duc.
Scumencion a vester coche prim plu daulëibon cun nëus nstësc, scutan su scialdi deplù a chël che nosc corp y nosta ana uel nes dì.
Scuton su nosc bujëns, jon demez dal funziuné y jon de reviers ala vivanda. Judonse l un cun l auter a abiné ora per cie che ulon viver, abinan nosta denità, svilupan nosc potenziai te na cumenanza de crëta.
Per na vita cuntënta, plëina de amor y pesc,
