Dumandes fates l plu suvënz

Urganisazion

Ie pa Gaia na scola?

Sci! La Scola Gaia ie śën na scola privata ufizielmënter recunesciuda dala ntendënza tudëscia (ajache la scola ie tl chemun de Laion).

Chësc uel di che i mutons y la mutans ie scric ite diretamëter te nosta scola y ne n'ie nia plu tla istruzion parentela.

Ie pa i mutons y mutans for dedora tl bosch?

Tla scolina de Gaia ie i mutons y la mutans uni di sibe detite te cësa che dedora tl bosch, da uni tëmp. (Ora che l jeta damat dassënn).

Te scola va i mutons trëi iedesc al'ena tl bosch: Lunesc, marendan tl bosch y merdi y juebia do marënda. Per l rest dl tëmp iesi te cësa te na majera tlas anjinieda ite cun truep material didatich adatà a uni età y nteres.

Te cësa ons nce na berstot y n atelier da depënjer.

Co ie pa i orares?

Calënder de scola
Se tenion al calënder scolastich publich. Plu inant possl nce unì a sl dé mudamënc.

Orares
Lunesc: 07.50 - 14.00 (Tò pea la marënda da cësa)
Merdi y juebia: 07.50 - 15.00 (Cujinon y maion deberieda te cësa)
Mierculdi y vënderdi: 07.50 - 12.30

Ie pa i mutons segurei?

Deventan cumëmbri dla lia iesen automaticamënter segurei contra manacedes de respunsabltà zevila.

Co iela pa cun la valutazions, ejams, duvieres...?

I mutons y la mutans ne vën nia muserei y valutei aldò de si prestazions, metan la atenzion sun cër' traverc dac dant dal estern che ie da arjonjer nchin a na cërta età, ma fajan plutosc na documentazion ndividuela dl svilup de aprendimënt ti ciamps plu defrënc. Tl focus ie for l*a mut*a te si svilup ndividuel.

Nsci ne vëniel dat deguna notes y l ne vën nce de no fat degun ejams. L ne n'ie nce nia de bujën de fé duvieres a cësa.

Co iela pa sce la muta ulëssa daldò jì a fé na scola auta spezifica o adrova l ejam de maduranza?

Sibe per l'un che per l auter van da na scola recunesciuda (mesana/auta) fajan la dumanda de pudëi fé pea l ejam dla terza mesana/de maduranza da privatist (che n possa nce fé p.ej. n ann dant, n ann do o mo plu inant).

Sul mparé...

Ie pa chësc proiet zeche per mi mut*a?

Per ti mut/a dessegur!
La dumanda ie plutosc sce l ie nce chël che vo coche genitores chirëis...

Aldò dla esperienzes che nëus nstësc on fat te nosc ani de scola da 3 ai 18 ani, ons bele cër modiei y cër' pensieres te nosc cë y paradlon nsci suvënz zënza ulëi l crëscer su de nosc mutons cun l nost, spidlan datrai sun ëi nce nosta tëmes coche nce nosta dejideresc...

L pudës' nce vester che ne son nia boni de se nmaginé coche la pudëssa vester autramënter...
Purvon ma a nia pensé a nosc passà, ai modiei de istruzion che cunescion, ma a udëi nosc mut/nosta muta nsci coche l/la ie śën, avisa nsci y a se nmaginé coche pudëssa cialé ora di per di n si crëscer su y mparé che va do a si natura, ulache l*a posse for se sentì bën cun sé nstës nsci coche l*a ie, ulache si ueia de mparé resta inant plëina de vivanda, ulache l*a possa se n sté bën n cumpania de autri, per pudëi jì inant sun si troi de vita cun ravises stersces y cun spirt cuntënt y segur*a te si cualiteies y forza de vester, per pudëi jì do a chël che l*a sënt te si dedite.

Nëus ulon jì debereida chësta streda per i mutons y la mutans.

Duc nëus ulon pu che nosc mutons sibe cuntënc, śën y te duta si vita. Nëus son dla minonga che chël posse garaté canche n possa vester nsci coche n ie, ulache uni persona à n post de valor per l bën y funziunamënt dla cumenanza.

Chësc proiet ie nsci zeche per vo sce...

sëis boni de lascé tumé vosta imaginazions, dejideres per l daunì ma nce tëmes y festidesc chë eis per vosta muta/vosc mut
ulëis che vosc mut/vosta muta posse se svilupé cun si ritms aldò de si talënc, si nteresc y si pascions, aldò de si vester, unfat de cie viers che l*a ulerà jì!

Ciuna metodologies adurvëis'a?

Ntant chisc ani de stude, furmazion y de liejer do d'uni sort de nfurmazions te chësc ciamp, ons mparà a cunëscer deplù ududes sun l mparé y crëscer di mutons y dla mutans. Uniun pea via da n auter pont de ududa, da n'autra situazion de scumenciamënt.
Pona se ons rendù cont - y chësc ie l plu bel - che duc adrova bën n pue' n auter vocabuler per spieghé y descrì la ideies (p.ej. Lernbegleiter, Pädagoge, Mentor) ma ala fin, la sustanza, chël che duc à abinà ora y uel purté per i mutons y la mutanas, ie bëndebo la medema!
Perchël ulons se cunzentré avisa sun chësc, spieghé de cie che la se trata, manco adurvé inuemes de cërta metodologies o scoles, ajache l focus dëssa resté sun l co y sun l cie, ulà y can y cun chi, sun la idea de mparé y crëscer su dl*a mut*a.

Co possa pa mi mut*a mparé?

jan do a si nteresc
cun duc i sënsc, pian via dala realtà viva y da materiai da pudëi pië ite (per jì daldò tla astrazion)
cun materiai didatichs de cualità auta anjiniei ca aposta
dala natura y cun la natura
te na grupa de età mescededa
zënza cuncurënza, prescion, notes y duvieres
cun si ritm (che possa for inò se mudé)
purvan ora y abinan ora, ancuntan problems y purvan a abiné soluzions
metan man dala cumpetënzes y savëi che l à iust
te si rujeneda dl'oma (o te una dla rujenedes dla valeda) y te n ambient trilinguistich cun didatica dla rujenedes ntegrela (cun sperimentazion dl'adurvanza dl nglëisc dal scumenciamënt incà)
vivan esperienzes reeles cun i acumpaniadëures, i cumpanies y da sëul/a, dedite y dedora
mparan da y cun d'autri cumpanies
giapan sustëni aldò de si debujëns
te na atmosfera de azetanza y stima cun cuer, un cun l auter y un da l auter

Cie possa pa mi mut*a mparé?

Mparon tl spirt che la scola ie vita y manco na preparazion ala vita. Nsci se dajons ju cun dut chël che ie "savëi", pona l ciamp dla emozions y dl cunviver y nia per ultim dut chël che à da n fé cun l viver pratich. Nsci vën i mutons y la mutans for inò nviei y ispirei a se dé ju cun d'uni sort de tematiches, ti lascian gran lerch a abiné ora y se dé ju plu tl sot cun chëi ciamps, ulache i à l majer nteres.

Tlo n valgun ejëmpli de tematiches che giapa lerch y la ucajions che vën pitedes per pudëi fé esperienzes:
amor per sé nstës, l bënsté dla grupa, cura y sanità, crëta te sé nstës, elemënc de relazions che buta danter persones, abiliteies conitives coche liejer y scrì, fé conc, rujené cun segurëza de plu rujenedes, mujiga, ert, lëures a man, lauré de verzon, se cruzië dla cosses de basa per viver, alimentazion cuscienta, mantenì y renfurzé si liam naturel cun la natura, adurvanza cun fundamënt dla tecnologia, ressolver cunflic te na maniera pazifica, senzierità y sentimënt de respunsabltà, se fé minonghes, recunescënza, empatia, y mo truep auter...

Resta for ajurnà tres l canal sun Telegram!

Tres chësc canal ulons fé al savëi a duc i nteressei coche l proiet Gaia va inant, cuntan y mustran nuviteies, velch dl’atività y vares mpurtanc. Oradechël ulons nce purté ite mpulsc y pensieres dla idea dl proiet.
(I messajes unirà scric baratan ju danter la rujenedes ladin, tudësch y talian.)
Che te posses sté saurì y te lecurdé for inò che nsci coche tu ies, avisa nsci, nsci ies adrët y unich! Ce bel che te ies tlo sul mond!

Rengrazion per l sustëni!

Tlo pudëssen udëi nce TI logo!
Gaia vën a s’l dé de gra a truep cumëmbri sustenidëures y sponsores.

De gra de cuer, uni aiut ie per nëus de gran mpurtanza!

GAIA
Lia de tueda y furmazion per l’ert dl viver y mparé naturel per l svilup dl putenziel criatif

Gaia ie na lia de utl coletif

IBAN: IT41O0823858890000300053520

Acioche i tesć se lascia liejer plu saurì, ons suvënz mé adurvà una na forma di sesc. Sambën iel cun chësta forma minà sibe l ses feminil che chël masculin.